醞釀兩年的膠袋稅週二實施，政府向每個背心膠袋徵稅五毫，預期新例可逼市民每年少用十億個膠袋。
新例是否奏效仍然未知，但膠袋業界卻發現超市預製膠袋、不織布袋和垃圾袋訂單激增；這些袋的膠量遠超背心袋，單單一年新製膠袋已等於八十八億個背心袋，減袋十億變成嘥袋七十八億個。
成姑娘短時間內在不同地方獲派環保購物袋，頭痛不知怎循環使用。
「之前成年冇去管理處攞垃圾袋，而家唯有攞番，垃圾袋大大個，肯定唔及背心袋咁環保啦！無法㗎，我唔會俾五毫子膠袋錢，有街坊話，買得多嘢，叫超市送貨上嚟，人力物力開車嘅油錢係佢哋嘅，唔關我事。」住在調景嶺健明邨的成姑娘，對膠袋稅的推行非常反感，她覺得，未見其利先見其害。
「最離譜係超市好多貨品喺架上一袋二袋袋好晒，話係特惠裝，透明膠袋裝住三支飲品或三盒餅，連洗潔精、洗頭水、雪糕、麥皮，乜都用個膠袋封住嚟賣，啲袋鬼咁厚，搣爛咗唯有係丟咗佢，唔可以循環再用！為咗避膠袋稅，超市搞咁多嘢，係咪無嘢搵嘢搞！」成姑娘大罵。
連尋常師奶都看得到膠袋稅未見其利，先見其害，但環境局偏偏視而不見。民間組織 107動力召集人何民傑就同政府計數，他在七大超市實地調查，發現每間超市至少有二十種品牌貨品為了逃避膠袋稅，以預製袋包裝，聲稱是特惠裝。他統計，每個品牌每日每店賣二百件，在七大超市旗下二千分店每日便共賣出八百萬件。
多用八十億個
環境局局長邱騰華連日四出做騷，推銷膠袋稅。
「一年就會消耗廿九億二千萬個不能循環再用的厚膠袋！要知道預製袋的膠厚度係一般背心袋的三倍，即等於一年用八十七億六千萬個背心袋，比環境局估計膠袋稅能省十億膠袋的數量還要多。這些袋用完即棄，無法再造，丟入堆填區的話，製造大量無法溶解的垃圾。」何解釋。
何民傑的估計不是空想，香港塑料袋業商會副會長劉志良表示，預製袋的訂單的確比往年同期多了兩成，除了預製袋，用來作環保袋的不織布袋也一樣訂單急升。「不織布袋呢半年比去年同期多咗五成訂單，單係我間廠已做了八萬個不織布袋。
扮作「環保袋」的不織布袋到底又等於幾多膠袋？百佳超級市場自稱近日換購不織布袋服務，向顧客派發超過八十萬個袋，保守估計，若今年各大超市推出一百萬個不織布袋，就等於四千萬個背心膠袋，加上相等八十七億六千萬個背心袋的預製袋，今年便新製了八十八億個袋，絕對因減得加。
「不織布袋好靚，越做越花巧，將膠料出厚壓花紋，再加埋絲帶、拉鍊及鈕釦，易攜帶、又時髦；成本價要十蚊一個，不過以前收集回來的膠袋，只要用電融化，用水冷卻，變成膠粒，我哋就可以循環再用，而家啲不織布袋，回收返嚟之後要用人手拆番晒啲拉鍊、絲帶、鈕釦出嚟，需要更多人力物力，循環再用的代價大咗好多。」劉又舉例，市場現在流行一些「令面」紙袋，實則內有四成膠料，客戶只製造環保的假象，實則膠紙袋承托力不及膠袋，容易爛。
不少商戶大造厚質預製袋作包裝，比背心膠袋更不環保。
百佳派出八十萬個不織布袋作環保購物袋，但每個袋膠量是背心膠袋的四十倍。
預製袋因減得加
20牌子貨品× 200件/日× 2000分店× 365日
=29.2億個× 3個背心袋
=87.6億個背心袋/年
劉志良批評，一個不織布袋須加厚壓紋，不僅膠料比背心膠袋多，連循環再用的程序也繁複。
據部分超市供應商說，部分超市不想支付額外的環保袋製作費，乾脆向上架的商戶揼心口，要求他們在環保袋上賣廣告，商戶不想得失超市唯有照付當宣傳費，結果換來現時超市提供不同款式的潮袋給顧客換領。甚至有傳超市亦預先通知商戶，最好把貨品預先包裝，方便顧客攜帶，因此近日超市推出不少聲稱優惠裝。
「背心膠袋的訂單確係少咗三成，不過隨之而來的，係垃圾袋多番三成，仲有超市裡面賣生果供顧客自取的一格格透明蔬果袋，又多兩成。」劉說：「人人以為背心膠袋係罪惡溫床，要除之而後快，但其實換來其他膠袋，後果仲大鑊，之前好多人用背心膠袋做垃圾袋，個背心位最啱打結，而家話要收稅，大家唔攞背心袋，用垃圾袋，成本對我嚟講係差唔多，不過垃圾袋的面積比背心袋大兩倍，因為我哋要做長啲俾客戶可以有位打結。」
劉說，全港一百二十個塑料廠廠商會員，只有十五間兼做膠袋、紙袋、不織布袋及垃圾袋，膠袋稅叫這十五間廠生意大增，「但其餘只做背心膠袋嘅廠，要佢哋發展多一條生產線，又做埋不織布袋及紙袋，係好沉重的事，由去年至今，已有五至六間公司倒閉，估計未來將會更多。」
政府誤導
政府聲言每日有千噸膠袋棄置堆填區，但團體踢爆堆填區最多的廢料是建築物料。
劉又踢爆政府一面扮環保，強推膠袋稅，但另一方面，膠袋業界建議政府發展塑料回收業，甚至有英國及澳洲顧問公司來港探路，欲搞塑料回收業，「我哋叫政府撥塊地出嚟，但政府一直就係拖，考慮吓先啦，無次搞得成。而家話預計每年兩億膠袋稅，係咪會真係搞好塑膠回收業呢，政府都係話考慮吓先！」
何民傑亦踢爆政府連串大話，「環保署○五年委託顧問公司 GHK進行的研究報告，不建議港府開徵膠袋稅，因為膠袋只佔本港總垃圾量百分之一點八。但政府最終當無聽過，個報告都只登喺環保署網頁內，仲係英文版，擺明唔想太多人知。即使唔聽本地顧問公司，都可以參考其他國家例子，好似愛爾蘭咁，膠袋稅實施初期，確係少咗九成膠袋，不過好快已得番七成，因為市民已經慣咗膠袋稅。」
週二實施膠袋稅，有市民堅持環保，不帶環保袋又不取膠袋。
「政府又話每日傾倒成千噸膠袋垃圾落堆填區，實情係堆填區內大部分係建築廢料，當中最多屬建築廢料，佔總量四成。」何批評：「環保係應該從生活習慣開始去改，如果要強制立法，只會造成反效果，膠袋稅如是，即使邱騰華而家搞緊的停車熄匙都一樣，第日唔想停車無冷氣，啲人咪四圍兜圈兜到要上車為止囉，車的廢氣一樣係污染環境。」
愛爾蘭經驗不跌反升
同期紙袋數量大幅上升，膠垃圾袋用量更飆升十倍，雙方互相抵銷，膠袋總用量不減反加。當地政府○七年再把環保費增至二角二仙歐羅（即約港幣二元三角）。不過環保團體的數字顯示，垃圾袋卻增加了七萬多個。
